Xızıda “Şəhadət” sənədli filmi nümayiş etdirilib

11.01.2018

Yanvarın 11-də Xızı rayonu Nicat Allahverdiyev adına Sitalçay kənd tam orta məktəbində “Şəhadət” sənədli filmi nümayiş olunub.

Tədbirdə məktəbin direktoru Zəfər Novruzov, Dini Qurumlarla İş üzrə Dövlət Komitəsinin (DQİDK) Sumqayıt bölgəsi üzrə şöbəsinin əməkdaşı Abdulla Hüseynov, müəllimlər və yuxarı sinif şagirdləri iştirak ediblər.

Tədbiri giriş sözü ilə açan məktəbin direktoru Zəfər Novruzov bildirib ki, gənclərin yad ideologiyalardan və zərərli vərdişlərdən qorunmasında elmin, təhsilin, dini maarifləndirmə tədbirlərinin mühüm əhəmiyyəti var. Natiq çıxışında radikalizm, fanatizm kimi neqativ halların qarşısının alınmasında həqiqi İslam dəyərlərinin təbliğinin əhəmiyyətli olduğunu vurğulayıb.

DQİDK-nın Sumqayıt bölgəsi üzrə şöbəsinin əməkdaşı Abdulla Hüseynov qeyd edib ki, radikal dini qrupların və qeyri-ənənəvi cərəyanların zərərlərinin qarşısının aınması, milli-mənəvi dəyərlərin və ölkədəki tolerantlıq mühitinin qorunub saxlanılması savadlı, vətənpərvər gənc nəslin formalaşmasından asılıdır. Natiq bildirib ki, təqdim olunan “Şəhadət” sənədli filmi gənclərə yad və zərərli dini düşüncələrin fərdin və cəmiyyətin həyatına təhlükəli təsirlərini izah etmək, onlara ərazi bütövlüyümüz uğrunda şəhid olan Vətən oğullarının vətənpərvərlik əxlaqını və şücaətini aşılamaq məqsədi daşıyır.

Daha sonra “Şəhadət”sənədli filmi nümayiş olunub və iştirakçıları maraqlandıran suallar cavablandırılıb.