Xaçmazda dini radikalizmlə mübarizə məsələləri müzakirə olunub

25.08.2016

Avqustun 25-də Dini Qurumlarla İş üzrə Dövlət Komitəsinin və Xaçmaz Rayon İcra Hakimiyyətinin birgə təşkilatçılığı ilə rayonun Nərəcan kənd məscidində “Dini radikalizmlə mübarizə yolları” mövzusunda tədbir keçirilib. Tədbirdə DQİDK-nın Dini maarifləndirmə işinin təşkili şöbəsinin müdiri Sadiq Mirzəyev, Dinşünaslıq ekspertizası şöbəsinin müdir müavini Cahandar Əlifzadə, Quba bölgəsi üzrə şöbəsinin müdiri Eynulla Nurullayev, Xaçmaz Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Ceyhun Musayev və ictimaiyyət nümayəndələri iştirak ediblər.

Tədbiri giriş sözü ilə açan Xaçmaz RİH başçısı Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Ceyhun Musayev bu cür tədbirlərin əhəmiyyətindən danışıb.

Tədbirdə çıxış edən DQİDK-nın Quba bölgəsi üzrə şöbəsinin müdiri Eynulla Nurullayev ölkəmizdə mövcud olan tolerant mühitdən bəhs edib.

DQİDK-nin Dini maarifləndirmə işinin təşkili şöbəsinin müdiri Sadiq Mirzəyev və Dinşünaslıq ekspertizası şöbəsinin müdir müavini Cahandar Əlifzadə çıxışlarında İslamın terrorla eyniləşdirilməsi cəhdlərinə toxunaraq bunu səhv yanaşma adlandırıblar.

Tədbirdə o da vurğulanıb ki, dini zəmində baş verən müharibələr cəmiyyətin normal ahəngini pozur, onun psixoloji vəziyyətini mənfi tərəfə dəyişir.

Müzakirələrlə davam etdirilən tədbirin sonunda DQİDK-nın sifarişi ilə ərsəyə gələn “Fitnə” filmi nümayiş olunub.