Tərtərdə “Şəhadət” sənədli filmi nümayiş olunub

02.03.2018

Martın 1-də Tərtər Rayon İcra Hakimiyyəti və Dini Qurumlarla İş üzrə Dövlət Komitəsinin Ağcabədi bölgəsi üzrə şöbəsinin birgə təşkilatçılığı ilə Tərtər şəhər 2 saylı məktəb-liseydə Dövlət Komitəsinin sifarişi ilə çəkilmiş “Şəhadət” sənədli filmi nümayiş olunub.

Tədbirdə İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Elvin Umudov, Dini Qurumlarla İş üzrə Dövlət Komitəsinin Ağcabədi bölgəsi üzrə şöbəsinin əməkdaşı Pərviz Eyvazov, Tərtər şəhər 2 saylı məktəb-liseyin direktoru Gülarə Əkbərova, müəllimlər və yuxarı sinif şagirdləri iştirak ediblər.

Tədbiri giriş sözü ilə açan Tərtər RİH başçısı Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Elvin Umudov bildirib ki, bu film dini radikalizmə qarşı mübarizə mövzusunda Dövlət Komitəsinin sifarişi əsasında çəkilib və vətənpərvərlik tərbiyəsi baxımından böyük əhəmiyyətə malikdir.

Qeyd olunub ki, ümumiyyətlə gənc nəslin düzgün istiqamətdə, Vətənə layiqli övlad kimi tərbiyə olunmasında “Şəhadət” sənədli filminin tərbiyəvi əhəmiyyəti böyükdür.