Suraxanı rayonunda maarifləndirici tədbir təşkil olunub

05.04.2017

Aprelin 5-də Azərbaycan Respublikası Prezidentinin 2017-ci ilin “İslam Həmrəyliyi İli” elan olunması barədə Sərəncamından irəli gələn vəzifələrin icrasını təmin etmək məqsədilə Azərbaycan Respublikasının Təhsil Nazirliyi və Dini Qurumlarla İş üzrə Dövlət Komitəsi tərəfindən birgə imzalanmış “Təhsil müəssisələrində uşaq və gənclərin mənəvi inkişafi, milli-mənəvi və ümumbəşəri dəyərlər ruhunda tərbiyə olunması tədbirlərinin gücləndirilməsi haqqında” Fəaliyyət Planına uyğun olaraq, Suraxanı rayonu 318 nömrəli tam orta məktəbdə maarifləndirici tədbir keçirilib.

“Milli-mənəvi dəyərlər və İslam həmrəyliyi” mövzusunda keçirilən tədbirdə DQİDK-nın Bakı şəhəri üzrə şöbəsinin əməkdaşları Samir Yoldaşov, Fidan Aslanova, Suraxanı Rayon İcra Hakimiyyəti (RİH) başçısı Aparatının İctimai-siyasi və humanitar məsələlər şöbəsinin müdir müavini - dini qurumlarla işin təşkilatçısı Rəşid Məmmədov, məktəbin direktoru Mürsəl Kazımov, adıçəkilən məktəbin şagird və müəllimləri iştirak ediblər.

Tədbiri giriş sözü ilə açan məktəbin direktoru M.Kazımov İslam dininin humanist və sülhsevər din olduğunu qeyd edib. Məktəblərdə bu mövzuda maarifləndirmə tədbirlərinin təşkilinin xüsusi əhəmiyyətli olduğunu vurğulayıb.

Daha sonra Dövlət Komitəsinin sifarişi ilə hazırlanan “Fitnə” sənədli filmi nümayiş edilib.

Filmin nümayişindən sonra DQİDK-nın Bakı şəhəri üzrə şöbəsinin əməkdaşı Samir Yoldaşov Azərbaycanda tarixən formalaşmış tolerantlıq mühitindən, dostluq və qardaşlıq içində yaşayan çoxsaylı xalqların həyatından, multikultural dəyərlərin inkişafından bəhs edən geniş məruzə ilə çıxış edib.

Suraxanı RİH başçısı Aparatının İctimai-siyasi və humanitar məsələlər şöbəsinin müdir müavini - dini qurumlarla işin təşkilatçısı Rəşid Məmmədov çıxışında dini maarifləndirmə sahəsində görülən işlərdən və həyata keçirilən layihələrdən söz açıb.

Sonda müəllim və şagirdləri maraqlandıran suallar cavablandırılıb.