08.11.2016
.jpg)
.jpg)
Sumqayıtda “Tolerantlıq - dinlər və millətlərarası dialoqun təminatçısı” mövzusunda tədbir keçirilib
Noyabrın 8-də Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin təşkilatçılığı ilə Sumqayıt “Cümə” məscidində “Tolerantlıq - dinlər və millətlərarası dialoqun təminatçısı” mövzusunda tədbir keçirilib.
Tədbirdə DQİDK-nın Sumqayıt bölgəsi üzrə şöbəsinin müdiri Şirin Cəfərov, Sumqayıt Şəhər İcra Hakimiyyətinin nümayəndəsi Fərman Kazımov, “Cümə” məscidinin axundu Rauf Sərdarov, şəhərdə fəaliyyət göstərən müsəlman dini icma sədrləri, eləcə də “Sumqayıt Yəhudiləri dini icması”, “Molokan ruhani – xristian dini icması”, “Bəhai” dini icması və “Həyat sözü -2” Sumqayıt xristian dini icmalarının nümayəndələri iştirak ediblər.
Tədbiri giriş sözü ilə açan DQİDK-nın Sumqayıt bölgəsi üzrə şöbəsinin müdiri Şirin Cəfərov ilk öncə qarşıdan gələn 9 noyabr – Azərbaycan Respublikasının Dövlət Bayraq günü və 16 noyabr Beynəlxalq Tolerantlıq günü münasibəti ilə tədbir iştirakçılarını təbrik edib. O bildirib ki, Beynəlxalq Tolerantlıq günü 1995-ci ildə UNESCO-nun 50 illiyi münasibətilə təsis edilib. Məqsəd qurumun da nizamnaməsində qeyd olunduğu kimi, dünyada hamını biri-birinə dözümlülük nümayiş etdirərək mehriban qonşular kimi yaşamağa çağırışdır. Azərbaycan indi bütün dünyada həm də tolerantlıq örnəyi kimi tanınır. Ulu Öndər Heydər Əliyev və onun siyasi kursunun davamçısı ölkə başçısı cənab İlham Əliyevin ölkəmizdə tolerantlığın qorunub saxlanılması istiqamətində həyata keçirdiyi tədbirlər Azərbaycanı müxtəlif milli və mədəni dəyərlərin qovuşma müstəvisinə çevirib. Azərbaycan indi dünyanın nadir ölkələrindəndir ki, burada bütün millətlərin, xalqların, dinlərin nümayəndələri bir ailə kimi yaşayır. Ölkəmizdə dini və milli dözümlülük, tolerantlıq yüksək səviyyədədir.
Sumqayıt Şəhər İcra Hakimiyyətinin nümayəndəsi Fərman Kazımov da çıxış edərək tolerantlığın Azərbaycanın dövlət siyasəti olduğunu bildirib və bu mühitin qorunub saxlanılması üçün görülən işlərdən danışıb. Tolerantlığın xalqımızın həyat tərzi olduğunu bildirən natiq bu nümunəvi yaşam normasının başqa millətlərin və dinlərin nümayəndələrinin iştirakı ilə ölkəmizdə keçirilən beynəlxalq forumlar və konfranslar vasitəsilə dünyaya uğurla təqdim edildiyini qeyd edib.
Qafqaz Müsəlmanları İdarəsinin Şimal bölgəsi üzrə qazısı, “Cümə” məscidinin axundu Rauf Sərdarov və digər müsəlman dini icma sədrləri, ilahiyyatçılar mövzu ətrafında danışaraq Azərbaycan xalqının tolerantlıq düşüncəsinin həm də bu xalqın sahib olduğu İslam dininə inancından irəli gəldiyini qeyd ediblər. Vurğulanıb ki, insanlara qarşı dininə, dilinə, milli kimliyinə görə ayrı-seçkilik və düşmənçilik münasibəti İslam dini nöqteyi-nəzərindən günah hesab edilir.
Tədbirdə iştirak edən qeyri – İslam dini icmalarının nümayəndələri də çıxış edərək ölkəmizdə dini etiqad azadlığının təminatından məmnunluqlarını ifadə ediblər, istər əmək fəaliyyətində, istər qonşuluq münasibətlərində, sosial həyatın hər hansı bir sahəsində özlərinə qarşı yad münasibət hiss etmədiklərini bildiriblər. Azərbaycan Respublikasının vətəndaşı kimi suverenliyimizin qorunması və dövlətçiliyin inkişafında öz məsuliyyətlərini dərk etdiklərini diqqətə çatdırıblar.