Sumqayıtda şagirdlərə “Fitnə” sənədli filmi nümayiş etdirilib

27.02.2017

Fevralın 27-də Dini Qurumlarla İş üzrə Dövlət Komitəsinin (DQİDK) Sumqayıt bölgəsi üzrə şöbəsinin təşkilatçılığı ilə Sumqayıt şəhər 17 saylı tam orta məktəbdə “Dini radikalizmə qarşı mübarizədə təhsilin əhəmiyyəti” mövzusunda tədbir keçirilib. Tədbirdə DQİDK-nın Sumqayıt bölgəsi üzrə şöbəsinin aparıcı məsləhətçisi Ülvi Məmmədov, məktəbin direktoru Mehriban Nəcəfova, müəllimlər və yuxarı sinif şagirdləri iştirak ediblər.
Tədbiri giriş sözü ilə açan məktəb direktoru Mehriban Nəcəfova dini radikalizmin müasir dövrün ən böyük təhlükələrindən biri olduğunu bildirib. O, insan və cəmiyyət həyatını faciəyə aparan zərərli dini cərəyanların təsirinə düşməmək üçün milli-mənəvi dəyərlərimizin düzgün formada öyrənilməsinin vacibliyini qeyd edib və bu sahədə təhsilin önəmindən danışıb.

Daha sonra çıxış edən DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov dini radikalizmin mahiyyəti, təbliğat metodları və qeyri-ənənəvi dini cərəyanların ölkə ərazisində fəaliyyət istiqamətləri barədə məlumat verib. O bildirib ki, hər bir gənc yüksək təhsil vasitəsilə milli özünüdərkə sahiblənərək yad ideoloji təsirlərdən uzaq olmalıdır.

Çıxışlardan sonra Dini Qurumlarla İş üzrə Dövlət Komitəsinin sifarişi ilə çəkilən “Fitnə” sənədli filmi nümayiş etdirilib.Filmin nümayişindən sonra tədbir iştirakçılarının sualları cavablandırılıb.