Sumqayıtda “İslamda birgəyaşayış ənənəsi” mövzusunda maarifləndirici tədbir keçirilib

17.01.2017

Yanvarın 17-də Sumqayıt şəhəri Corat qəsəbə məscidi dini icması tərəfindən “İslam dini vəhdət və qardaşlıq dinidir” layihəsi çərçivəsində “İslamda birgəyaşayış ənənəsi” mövzusunda maarifləndirici tədbir keçirilib.

Tədbirdə Dini Qurumlarla İş üzrə Dövlət Komitəsinin (DQİDK) Sumqayıt bölgəsi üzrə şöbəsinin əməkdaşları Ülkər Mövsümlü və Ülvi Məmmədov, Corat qəsəbə məscidi dini icmasının sədri Sahib Məmmədov, qadınlar və məktəblilər iştirak ediblər.

Tədbiri giriş sözü ilə açan dini icmanın sədri Sahib Məmmədov layihə çərçivəsində həyata keçiriləcək maarifləndirmə tədbirlərinin əhəmiyyətindən danışıb. Qeyd edib ki, dövlət başçısının dini icmalara dini maarifləndirmə və milli-mənəvi dəyərlərimizin qorunması ilə bağlı maliyyə yardımının ayrılması barədə Sərəncamı dövlətin dinə olan qayğısından irəli gəlir.

Sonra çıxış edən DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov tarixən xalqımıza xas olan tolerantlıq, ayrı-ayrı milli və dini konfessiyaların dözümlülük şəraitində birgəyaşayış ənənələrindən bəhs edib. Bildirib ki, bu ənənələrin qorunması və gələcək nəsillərə ötürülməsi ümdə vəzifələrimizdən olmalıdır.

DQİDK-nın Sumqayıt bölgəsi üzrə şöbəsinin baş məsləhətçisi Ülkər Mövsümlü İslam dininin vəhdət, birlik, humanizm, yüksək əxlaq kimi çağırışlarının cəmiyyətə ötürülməsində qadınların rolundan danışıb

Tədbirin sonunda iştirakçıların sualları cavablandırılıb.