Sumqayıtda “Dini radikalizm və terror” mövzusunda tədbir keçirilib

25.10.2016

Oktyabrın 25-də DQİDK-nın Sumqayıt bölgəsi üzrə şöbəsi və Dövlət Təhlükəsizliyi Xidmətinin Sumqayıt şöbəsinin birgə təşkilatçılığı ilə Sumqayıt şəhərində yerləşən “Tarix” muzeyində “Dini radikalizm və terror” mövzusunda tədbir keçirilib.

Tədbirdə Sumqayıt Şəhər İcra Hakimiyyətinin nümayəndəsi Fərman Kazımov, DTX-nın Sumqayıt şəhər İdarəsinin şöbə rəisi Fariz Hüseynov, idarənin əməkdaşı Elçin İsgəndərov, DQİDK-nın aparıcı məsləhətçisi Ülvi Məmmədov və şəhərdə fəaliyyət göstərən orta məktəblərin təlim-tərbiyə işləri üzrə direktor müavinləri iştirak ediblər.

Tədbiri giriş sözü ilə açan Sumqayıt Şəhər İcra Hakimiyyətinin nümayəndəsi Fərman Kazımov dövlət-din münasibətləri, bu sahədə görülən işlər barədə iştirakçıları məlumatlandırıb. O qeyd edib ki, bu gün Yaxın və Orta Şərq regionunda dini zəmində baş verən qarşıdurmalar müsəlman ölkəsi olaraq bizi də narahat edir. Məhz buna görə də dini radikalizm, onun mahiyyəti və fəsadları barədə geniş informasiyaya sahib olmaq, gənclərimizi belə qorxulu təsirlərdən qorumaq məqsədi ilə maarifləndirmə işini genişləndirmək zərurəti yaranır.

Sonra çıxış edən DQİDK-nın əməkdaşı Ülvi Məmmədov ölkəyə kənardan daxil olan qeyri-ənənəvi, zərərli dini cərəyanlar, onların mahiyyəti barədə tədbir iştirakçılarına geniş məlumat verib. O bildirib ki, DQİDK ayrı-ayrı icra strukturları, eləcə də hüquq-mühafizə orqanları ilə birgə dini radikalizmə qarşı ideoloji və hüquqi müstəvidə effektiv mübarizə aparır, dini təəssübkeşliyin dini təkəbbür halı almasının qarşısı uğurla alınır.

DTX-nın Sumqayıt şəhər İdarəsinin şöbə rəisi Fariz Hüseynov və idarə əməkdaşı Elçin İsgəndərov da çıxış edərək beynəlxalq terrorizmin bir qolu olan dini radikalizm və ekstremizmə qarşı mübarizənin hüquqi tərəflərini geniş şərh ediblər.

Tədbirin sonunda iştirakçıların sualları cavablandırılıb.