Sumqayıt və Xırdalan şəhərlərində "Fitnə" filmi nümayiş etdirilib

23.11.2016

Noyabrın 23-də Sumqayıt şəhərində yerləşən 12 nömrəli tam orta məktəbdə DQİDK-nın təşəbbüsü ilə çəkilən “Fitnə” sənədli filmi nümayiş etdirilib.

Tədbirdə məktəbin direktoru Mətanət Abdullayeva, DQİDK-nin Sumqayıt bölgəsi üzrə şöbəsinin aparıcı məsləhətçisi Ülvi Məmmədov, məktəbin müəllimləri və şagirdlər iştirak ediblər.

Giriş sözü ilə çıxış edən direktor Mətanət Abdullayeva gəncləri zərərli dini cərəyanlardan uzaq olmağa çağırıb. Qeyd edib ki, nümayiş etdirilən “Fitnə” filmi izləyicilərə dini radikalizm və onun mahiyyəti barədə ətraflı məlumat almaq imkanı verir.

Daha sonra çıxış edən DQİDK-nin Sumqayıt bölgəsi üzrə şöbəsinin aparıcı məsləhətçisi Ülvi Məmmədov “Fitnə” filmi haqqında qısa məlumat verib, şagird və müəllim heyətinə zərərli dini cərəyanlar, onların fəaliyyət istiqamətləri və cəmiyyət üçün təhlükələrindən danışıb.

Sonda iştirakçılara “Fitnə” filmi nümayiş etdirilib, film haqqında müzakirələr aparılıb.

***

Noyabrın 23-də Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin təşkilatçılığı ilə Abşeron rayonu Xırdalan şəhəri 1 saylı tam orta məktəbdə “Fitnə” sənədli filminin nümayişi olub. Tədbirdə DQİDK-nın Sumqayıt bölgəsi üzrə şöbəsinin əməkdaşları, məktəb müəllimləri və yuxarı sinif şagirdləri iştirak iştirak ediblər.

Tədbiri giriş sözü ilə açan məktəbin təlim-tərbiyə məsələləri üzrə direktor müavini Famil müəllim gənclərin zərərli dini qruplardan qorunmasında təhsilin vacibliyini vurğulayıb. O, qeyd edib ki, belə maarifləndirici tədbirlərin tez-tez keçirilməsi şagirdlərdə məntiqi təfəkkürün və sağlam iradənin formalaşmasına müsbət təsir edir.

Daha sonra çıxış edən DQİDK-nin Sumqayıt bölgəsi üzrə şöbəsinin baş məsləhətçisi Orxan Axundov film haqqında danışıb. 2016-cı ilin Azərbaycan Respublikasının Prezidenti cənab İlham Əliyev tərəfindən “Multikulturalizm İli” elan edildiyini vurğulayan O.Axundov bu sahədə görülən tədbirlər haqqında şagird və müəllimləri məlumatlandırıb. Ümummimilli Lider Heydər Əliyevin təməlini qoyduğu dövlət-din münasibətlərində tolerant mühitin önəmindən danışan əməkdaş məktəb müdiriyyətinə göstərdikləri köməyə görə təşəkkürünü bildirib.

Sonda film ətrafında müəllim və şagirdlərin iştirakı ilə geniş müzakirə aparılıb.