06.04.2016
Sumqayıt və Samuxda maarifləndirmə tədbirləri keçirilib
Prezident İlham Əliyevin ölkədə dini maarifləndirmə və milli-mənəvi dəyərlərin təbliği işini daha da gücləndirmək məqsədilə dini icmalara maliyyə yardımı göstərmək üçün 2014-cü il noyabrın 27-də imzaladığı Sərəncama əsasən bölgələrdə tədbirlər keçirilir.
Aprelin 6-da Sumqayıt şəhəri Kotec qəsəbəsi “ İmam Sadiq” məcdidi dini icmasının “ İslamda ailənin rolu” layihəsi çərçivəsində növbəti tədbir keçirilib. Tədbirin əvvəlində Dövlət himni səsləndirilib və şəhidlərimizin ruhuna dualar oxunub.
Tədbiri giriş sözü ilə açan dini icmanın sədri Mirfəyyaz Fəttayev çıxışında İslamda ailənin rolu , erkən nikahlar və onun fəsadları barədə ətraflı söhbət açıb. O qeyd edib ki, belə nikahlar müxtəlif aspektlərdən olduqca zərərlidir və cəmiyyətin bu məsələ ilə bağlı ciddi şəkildə maarifləndirilməsinə ehtiyac var.
Tədbirdə çıxış edən DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov mövzunun olduqca aktual olduğunu bildirib. Milli-mənəvi dəyərlərimizin vacib hissəsi kimi ailə institumuzun öyrənilməsi, onun qorunub saxlanılmasının vacibliyindən bəhs edən natiq, erkən nikahlar və onun zərərlərini sosial-psixoloji baxımdan izah edib. O, eyni zamanda dünyada və ölkəmizdə erkən nikahlarla bağlı statistik məlumatları tədbir iştirakçılarının diqqətinə çatdırıb.
* * *
Aprelin 6-da Dini Qurumlarla İş üzrə Dövlət Komitəsinin dəstəyi ilə digər maarifləndirici tədbir Samux rayon Samux şəhər müsəlmanları dini icmasının həyata keçirdiyi “Radikalizmə qarşı mübarizədə milli-mənəvi dəyərlərimizdən istifadə ” layihəsi çərçivəsində “Radikalizmə yox deyək” mövzusunda keçirilib.
Samux rayon Sərkar kənd İcra nümayəndəliyində təşkil edilmiş tədbirdə Dini Qurumlarla İş üzrə Dövlət Komitəsinin Gəncə bölgəsi üzrə şöbəsinin müdiri Asif Əliyev, şöbənin məsləhətçisi Rövşən Hacıyev, dini icmanın sədri İlham Məmmədov, Samux rayon İH-nin İctimai siyasi və humanitar məsələlər şöbəsinin müdir müavini - dini qurumlarla işin təşkilatçısı Elnaz Cəfərova, Samux rayon İH-nin əməkdaşı Azər Əhmədov iştirak ediblər.
Tədbiri giriş sözü ilə açan Samux rayon İH-nin İctimai siyasi və humanitar məsələlər şöbəsinin müdir müavini - dini qurumlarla işin təşkilatçısı Elnaz Cəfərova, Dövlət Komitəsinin ümumilikdə respublikada, eyni zamanda Samux rayonunda dini maarifləndirmə sahəsində gördüyü işlərdən danışıb. Elnaz Cəfərova bildirib ki, layihə çərçivəsində sağlam dini biliklərə söykənən silsilə maarifləndirmə tədbirləri həyata keçiriləcək. Tədbirdə ekspert kimi çıxış edən DQİDK-nın Gəncə bölgəsi üzrə şöbəsinin müdiri Asif Əliyev layihə çərçivəsində həyata keçirilməsi nəzərdə tutulan tədbirlərin əhəmiyyətindən söhbət açaraq, dövlət başçısının dini icmalara dini maarifləndirmə və milli-mənəvi dəyərlərimizin qorunması ilə bağlı maliyyə yardımının ayrılması barədə Sərəncamını dövlətin dinə olan növbəti qayğısı kimi qiymətləndirib.
Tədbirdə çıxış edən Samux rayon Samux şəhər müsəlmanları dini icmasının sədri İlham Məmmədov dini maarifləndirmə sahəsində görülən işlərin müsbət nəticələrini xüsusi qeyd edib.
Tədbirdə şəhidlərimizin ruhu üçün dualar oxunub, xatirələri hörmətlə yad edilib.