Sabirabadda “Torpaq əgər uğrunda ölən varsa vətəndir və İslamda şəhidlik zirvəsi” mövzusunda tədbir keçirilib

27.02.2017

Fevralın 25-də Sabirabad rayon Əsgərbəyli kəndi “İmam Əli” kənd məscidi dini icması tərəfindən “Milli-mənəvi dəyərlərimiz və müasirlik” layihəsi çərçivəsində “Torpaq əgər uğrunda ölən varsa vətəndir və İslamda şəhidlik zirvəsi” mövzusunda maarifləndirici tədbir keçirilib.

Tədbirdə Dini Qurumlarla İş üzrə Dövlət Komitəsinin (DQİDK) İmişli bölgəsi üzrə şöbəsinin müdiri Cavanşir Bəhrəmov, şöbənin əməkdaşları, Qafqaz Müsəlmanları İdarəsinin Sabirabad rayonu üzrə səlahiyyətli nümayəndəsi Ağakərim Sadıqov, Sabirabad rayon Əsgərbəyli kəndi “İmam Əli” kənd məscidi dini icmasının sədri Zakir Əliyev, kənd bələdiyyəsinin sədri Cəmil Məmmədov, Əsgərbəyli kənd Murad Hüseynov adına tam orta məktəbin müəllimləri, ziyalılar, kənd ağsaqqalları və gənclər iştirak ediblər.

Tədbir iştirakçıları əvvəlcə Xocalı faciəsi qurbanlarının əziz xatirəsini birdəqiqəlik sükutla yad ediblər. Daha sonra tədbiri giriş sözü ilə açan Sabirabad rayon Əsgərbəyli kəndi “İmam Əli” kənd məscidi dini icmasının sədri Zakir Əliyev müqəddəs dinimizdə Vətən, torpaq sevgisi, o cümlədən şəhidlik zirvəsi haqqında geniş məruzə edib.

DQİDK-nın İmişli bölgəsi üzrə şöbəsinin müdiri Cavanşir Bəhrəmov çıxışında Xocalı faciəsi barədə məlumat verərək tariximizin ən qanlı hadisələrindən biri olan, erməni silahlı dəstələri tərəfindən xalqımıza qarşı törədilmiş bu cinayət hadisəsi zamanı dinc, əliyalın əhalinin xüsusi qəddarlıqla qətlə yetirildiyini, əsir götürülən insanların dəhşətli işgəncələrə, zülm və təhqirlərə məruz qaldıqlarını qeyd edib.

Daha sonra çıxışçılar xalqımızın başına açılan müsibətlərin, yaşanan faciələrin gələcəyimiz olan gənclərə çatdırılması baxımından bu cür tədbirlərin keçirilməsinin böyük əhəmiyyət daşıdığını diqqətə çatdırıblar.

Tədbirin sonunda iştirakçılara Dövlət Komitəsi tərəfindən çapına icazə verilmiş dini ədəbiyyatlar paylanılıb.