Qubada Azərbaycan Respublikasının Dini Qurumlarla İş üzrə Dövlət Komitəsinin (DQİDK) təşkilatçılığı ilə respublikanın şimal bölgəsində fəaliyyət göstərən dini icma sədrləri, imam və axundlar, eləcə də fəal dindar və ilahiyyatçılar üçün “Milli adət-ənənələrimiz və müasirlik” mövzusundakı ikigünlük regional konfrans yekunlaşıb.
Dövlət-din münasibətlərinin daha yüksək səviyyədə tənzimlənməsi, dini maarifləndirmə işinin təşkili və aparılması, həmçinin, dini icmaların cəmiyyətdə radikalizm meyllərinin qarşısının alınması və sosial problemlərin həlli prosesinə cəlb olunması məqsədilə keçirilən regional konfransın ikinci günü bir sıra maraqlı məruzələrlə yadda qalıb.
“Ənənəvi İslam dini radikalizmlə mübarizədə real alternativ kimi”adlı plenar iclasda ilk olaraqQafqaz Müsəlmanları İdarəsinin (QMİ) bölgə qazısı Naib Səttarov “Azərbaycanın Şimal bölgəsində ənənəvi İslam”mövzusunda məruzə ilə çıxış edib. Natiq tarixən ölkəmizdə mövcud olan İslam dəyərləri, ənənəvi məzhəblər və onlar arasında olan tolerantlıq ənənələrindən danışıb. Mövzunun davamı olaraqBakı İslam Universitetinin müəllimi, f.d. Aslan Həbibov “Ənənəvi İslam: dini radikalizmə qarşı mənəvi müdafiə sistemi”adlı məruzəsində son illərdə yayılan qeyri-ənənəvi, radikal dini cərəyanlara qarşı ənənəvi İslamın düzgün təbliğ edilməsi ilə qarşısının alınmasının vacib olduğunu diqqətə çatdırıb.
“Milli adət-ənənələrimiz: dini icmalar və din xadimlərimiz”adlı plenar iclasda DQİDK-nın Dini qurumlarla iş üzrə şöbəsinin müdiri Niyaz Yaqubov “Milli-mənəvi dəyərlərimizin təbliğ olunmasında dini icmaların yeri və rolu” mövzusundakı məruzəsində milli-mənəvi dəyərlərimizin təbliğ edilməsinin və xüsusən də gənclərimizin bu ruhda yetişməsi üçün din xadimlərinin, dini icmaların fəaliyyətinin vacib olduğunu vurğulayıb.
Dini Araşdırmalar Mərkəzinin icraçı direktoru Natiq Rəhimovun “Din xadimlərinin natiqlik qabiliyyəti və motivasiya üsulları” adlı məruzəsində ruhanilərin və din xadimlərinin dinimizin təbliğ edilməsi istiqamətində apardıqları işdə cəmiyyətin ayrı-ayrı fərdlərinin xüsusiyyətlərinə uyğun metodlardan istifadə olunmasının əhəmiyyətini qeyd edib.
Fasilədən sonra davam edən konfransda DQİDK-nın Dinşünaslıq ekspertizası, ictimai məsələlər və analitik təhlil şöbəsinin müdiri Nahid Məmmədovun “Vətənpərvərlik milli-mənəvi dəyər kimi”, şöbənin müdir müavini Əliheydər Zülfüqarovun “Dini icmaların fəaliyyəti: imkanlar və perspektivlər”, Qafqaz Müsəlmanları İdarəsinin Quba rayonu üzrə səlahiyyətli nümayəndəsi, Quba şəhəri “Hacı Cəfər” məscidinin imamı Elnur Əfəndiyevin “İslamda vətən və dövlət sevgisi” mövzularındakı məruzələr dinlənilib, fikir mübadiləsi aparılıb.
Çıxış edən Quba rayonu Qırmızı qəsəbə Dağ Yəhudiləri dini icmasının sədri Boris Simanduyev bildirib ki, Azərbaycanda bütün dini icmalar birgə tolerant şəraitdə əsrlərdir yaşayıblar. Buna misal olaraq Simanduyev yad edib ki, Azərbaycanda yəhudilərin adət-ənənələrinin qorunub saxlanmasında müsəlmanların böyük xidmətləri olub: “Ona görə də mən bütün yəhudilər adından müsəlman Azərbaycan xalqına təşəkkür edirəm”.
Konfransın bağlanış mərasimində çıxış edən Dövlət Komitəsinin sədr müavini Gündüz İsmayılov bildirib ki, din xadimləri növbəti konfranslar üçün onları maraqlandıran mövzular təklif edə, eyni zamanda təklif etdikləri din alimləri də DQİDK tərəfindən konfranslara cəlb edilə bilər.
Bu konfranslarda məqsədin tək maarifləndirmə deyil, həm də dini icmaların təşkilatlandırılması və təlimatlandırılmasının olduğunu diqqətə çatdıran G. İsmayılov növbəti konfranslara dindarların cəlb edilməsi prosesində icmaların yaxından iştirak etməsinin zəruriliyini qeyd edib: “Çünki dini icmalar və din xadimləri regiondakı dini durumu daha yaxşı bilir və gənclərimizin dini maarifləndirilmə istiqamətində faydalı olan bu cür tədbirlərə cəlb edilməsi onların gələcək inkişafı üçün əhəmiyyətli olacaqdır”.
.JPG)
