Noyabrın 29-da Dini Qurumlarla İş üzrə Dövlət Komitəsi (DQİDK) və Nizami Rayon İcra Hakimiyyətinin (RİH)  birgə  təşkilatçılığı ilə 220 saylı tam orta məktəbində “Narkotik vasitələrin qəbulu və yayılmasına qarşı mübarizə: hüquqi və mənəvi müstəvidə” adlı maarifləndirici tədbir keçirilib.

Tədbirdə Dini Qurumlarla İş üzrə Dövlət Komitəsinin Bakı şəhəri üzrə şöbəsinin əməkdaşı Vasif Musayev, RİH başçısının müavini Tanrıverdi Aydınov, RİH başçısı Aparatının İctimai-siyasi və humanitar məsələlər şöbəsinin müdiri Vasif İsayev, məktəbin direktoru Gülnaz İsrafilova və başqaları iştirak ediblər.

Çıxışlar zamanı gənclərin zərərli vərdişlərin təsirindən qorunması istiqamətində maarifləndirici tədbirlər və görülmüş işlər barəsində ətraflı məlumat verilib. Yeniyetmələr arasında sağlam həyat tərzinin təbliği, onların zərərli vərdişlərdən uzaqlaşdırılması, narkomaniyaya qarşı aparılan mübarizənin səmərəliliyinin  artırılması istiqamətində  dövlətimiz tərəfindən aparılan işlərdən danışılıb.