“Fitnə” sənədli filmi Sumqayıt Dövlət Universitetinin tələbələri üçün nümayiş edilib

25.10.2016

Oktyabrın 25-də Sumqayıt Dövlət Universitetində Dini Qurumlarla İş üzrə Dövlət Komitəsinin sifarişi ilə çəkilən “Fitnə” sənədli filmi nümayiş olunub.

Tədbirdə Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin müdiri Şirin Cəfərov, Sumqayıt Dövlət Universitetinin prorektoru Nizami Namazov, universitetin müəllim və tələbələri iştirak ediblər.

Tədbiri giriş sözü universitetin prorektoru Nizami Namazov açaraq bu cür filmlərin gənclərin maarifləndirilməsi istiqamətindəki əhəmiyyətindən danışıb. Prorektor gənclərin radikal dini cərəyanların təsiri altına düşməməsi və bu istiqamətdə məlumatlandırılmasının təmin edilməsi üçün bu tipli maarifləndirici filmlərin çəkilməsinin və istiqamətləndirici tədbirlərin daha çox keçirilməsinin önəmini qeyd edib. O, gəncləri radikal dini cərəyanların təsirindən uzaq tutmaq, onlara dini, milli-mənəvi dəyərləri aşılamaq məqsədi ilə DQİDK tərəfindən həyata keçirilən maarifləndirici tədbirləri təqdirəlayiq hesab etdiyini bildirib.

Sonra çıxış edən DQİDK-nın Sumqayıt bölgəsi üzrə şöbəsinin müdiri Şirin Cəfərov dövlət-din münasibətlərindən, Dövlət Komitəsinin dini etiqad azadlığının təminatı sahəsində gördüyü işlərdən bəhs edib. O bildirib ki, Dövlət Komitəsi “Fitnə” adlı sənədli filmi dini radikalizmlə mübarizə çərçivəsində radikalizmlə mübarizənin dini, psixoloji, hüquqi, siyasi və mənəvi tərəflərinin işıqlandırılması məqsədilə hazırlayıb. Filmdə dini radikalizmin qurbanı olmuş insanların, eləcə də cinayət məsuliyyətinə cəlb edilmiş şəxslərin timsalında bu problemin cəmiyyət və dövlətimiz üçün nə qədər təhlükəli olduğu dolğun şəkildə açıqlanır.

Filmin nümayişindən sonra film ətrafında müzakirələr aparılıb.