“Fitnə” sənədli filmi Qubadlı məktəblilərinə nümayiş olunub

12.01.2017

Yanvarın 11-də Qubadlı rayonu Xocahan kənd tam orta məktəbində dini radikalizmlə mübarizədən bəhs edən “Fitnə” sənədli filminin nümayişi olub.

Tədbirdə Qubadlı rayon Xocahan kənd tam orta məktəbinin direktoru Fuad Bədəlov, Qubadlı Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Elşən Qəhrəmanov, rayon Gənclər və İdman İdarəsinin baş məsləhətçisi İslam Allahverdiyev və DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov iştirak ediblər.

Tədbiri giriş sözü ilə açan məktəbin direktoru Fuad Bədəlov zərərli dini cərəyanlarla mübarizə sahəsində maarifləndirmə işinin əhəmiyyətindən danışıb.

Qubadlı Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini–dini qurumlarla işin təşkilatçısı Elşən Qəhrəmanov çıxışında müsəlman ölkələrində dini zəmində baş verən qanlı qarşıdurmalardan bəhs edib. Natiq DQİDK-nın təşəbbüsü ilə hazırlanan “Fitnə” filminin gənclərin yad dini təsirlərdən qorunmasında effektiv təsirə malik olduğunu da diqqətə çatdırıb.

Daha sonra çıxış edən DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov ölkəmizdə mövcud olan multikultural və tolerantlıq ənənələrindən bəhs edib. O, tariximizin heç bir dönəmində Azərbaycanda dini zəmində qarşıdurmaların olmadığını, ölkəmizdə tarixən mövcud olan ayrı-ayrı milli, dini konfessiyaların dinc yaşadığını qeyd edib.