“Fitnə” sənədli filmi Corat qəsəbəsinin məktəbliləri üçün nümayiş edilib

07.11.2016

Noyabrın 7-də Sumqayıt şəhəri Corat qəsəbəsində yerləşən 7 nömrəli məktəbdə Dini Qurumlarla İş üzrə Dövlət Komitəsinin sifarişi ilə çəkilən “Fitnə” sənədli filmi nümayiş olunub.

Tədbirdə Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin əməkdaşı Ülvi Məmmədov, məktəbin direktoru Təranə Haqverdiyeva, müəllimlər və şagirdlər iştirak ediblər.

Tədbiri giriş sözü ilə açan məktəbin direktoru Təranə Haqverdiyeva qeyd edib ki, bu gün cəmiyyəti narahat edən məsələlərdən biri də gənclər arasında yalnış dini düşüncələrin təbliği, dini ifratçılıq və radikalizmdir. Gəncləri zərərli dini təsirlərdən qorumaq məqsədi ilə mütəmadi olaraq maarifləndirici tədbirlər həyata keçirilir, lazımi ədəbiyyatlar dərc edilir. Təqdim olunan “Fitnə” filmi də maarifləndirici xarakterlidir, izləyənlərdə dini radikalizmin mahiyyəti və fəsadları barədə ətraflı təsəvvür yaratmaq məqsədi daşıyır.

DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov film haqqında iştirakçılara ətraflı məlumat verib. O qeyd edib ki, filmdə dini radikalizmin qurbanı olmuş insanların, eləcə də cinayət məsuliyyətinə cəlb edilmiş şəxslərin timsalında bu problemin cəmiyyət və dövlətimiz üçün nə qədər təhlükəli olduğu dolğun şəkildə açıqlanır.

Daha sonra “Fitnə” sənədli filmi nümayiş edilib və film ətrafında müzakirələr aparılıb.