Görüşlər zamanı ölkələrimiz arasında dini sahədə olan məsələlər haqqında açıq sohbət aparılmış və konkret razılıqlar əldə edilmişdir.
 

Dini Qurumlarla İş üzrə Dövlət Komitəsi sədri Elşad İskəndərovun, İran İslam Respublikasına işgüzar səfəri çərçivəsində dünəndən etibarən rəsmi görüşləri başlanmışdır. Komitə sədri İranın yeni Mədəniyyət və İslami İrşad Naziri cənab Əli Cənnati,  İİR-in Ali Dini Liderinin müşaviri, ayətullah Əli Təsxiri, İİR Prezidentinin müşaviri, İslam Mədəniyyəti və Beynəlxalq Əlaqələr Təşkilatının sədri M. Xorrəmşad ilə görüşlər keçirmişdir.
 

Dostluq və qarşılıqlı hörmət şəraitində keçən görüşlərdə dini, mənəvi-mədəni, elmi sahələrdə İran- Azərbaycan əlaqələrinin mövcud durumu, onların inkişaf perspektivləri müzakirə edilmiş, İran və Azərbaycan arasında bu sahədə olan problemlər və onların aradan qaldırılması yolları fikir mübadiləsi aparılmışdır. Görüşlər zamanı dini və mənəvi – mədəni sahələrə aid , həmçinin ortaq tariximizdən irəli gələn mövzularda, ölkələrimizin qanunlarına hörmət, ortaq dəyərlərmizin qorunması və  ölkələrarası münasibətlərin möhkəmləndirilməsi prinsipləri çərçivəsində Dövlət Komitəsi ilə İranın müvafiq qurumları arasında konstruktiv əməkdaşlığın aparılması istiqamətində konkret razılıqlar əldə edilmişdir.

DQİDK sədri İranın rəsmi şəxslərinə Azərbaycanda dövlətin İslam dini dəyələrinə göstərdiyi gayğı haqqında ətraflı məlumat  vermiş, ölkəmizin müstəqillik dövründə Azərbaycanda məscidlərin sayının 17-dən 1800-dək yüksəldiyini, son 10 ildə 200-dən artıq məscidin inşa və bərpa olunduğunu, bu sahədə Azərbaycan Respublikası Prezidenti İlham Əliyevin təşəbbüslərini xüsusi vurgulamışdır.

Görüşlərdə diqqət mərkəzində olan əsas məsələlər sırasında hal hazırda bütün dünyanı narahat edən dini zəmində radikal dini cərəyan və hərakatların inkişafının qarşısının alınması sahəsində əməkdaşlıq perspektivləri; ortaq tarixi və mənəvi-mədəni irsin yaşadılması və birgə öyrənilməsi, İranda dini təhsil alan azərbaycanlı tələbələrin mövcud problemlərinin həlli  və bu prosesinin şəffaf və qanunauygun şəkildə aparılması olmuşdur.  
 

Komitə sədri həmçinin işğal olunmuş Azərbaycan ərazilərində Ermənistan tərəfindən müştərək dini dəyərlərimiz, o cümlədən İslamın dini və mədəni abidələrinə qarşı vandalizm faktlarını həmsöhbətlərinin diqqətinə çatdıraraq , qardaş İranın nüfuzlu dini xadimlərinin bu məsələyə İslam həmrəyliyi prinsipləri çərçivəsində münasibət bildirilmsinin vacibliyini xüsusi qeyd etmişdir. Görüşlər zamanı  iki ölkə arasında münasibətlərə mənfi təsir göstərən, dini sahəyə aid və bir çox hallarda əsassız məlumatların yayılmasının qarşısının alınması sahəsində əməkdaşlıq məsələsi müzakirə olunaraq hər iki tərəfdən bu sahədə birgə addımların atılması vacibliyi qeyd edilmişdir.

Bununla yanaşı İslam Mədəniyyəti və Beynəlxalq Əlaqələr Təşkilatının sədri M.Xorramşad ilə görüş zamanı, İslam mənəvi irsinin dünyaya tanıtdırılması istiqamətində son ildə DQİDK tərəfindən başlanmış layihələr haqqında məlumat verilmiş, bu sahədə iki qurum arasında Şəms Təbrizi, Seyid Yəhya Şirvani Bakuvi kimi mütəfəkkirlərin irsinin dünyada tanıdılması, Azərbaycan tədqiqatçılarının əsərlərindən ibarət məcmuənin İranda nəşr edilməsi haqqında konkret razılıqlar əldə edilmişdir.

Dövlət Komitəsinin rəsmi heyətinin səfər proqramı çərçivəsində bu gün Qumda nüfuzlu din xadimləri, Qum dini elmlər hövzəsinin rəhbərliyi və burada təhsil alan azərbaycanlı tələbələrlə görüşlərin keçirilməsi nəzərdə tutulub.

 Dövlət Komitəsi sədrinin rəsmi görüşlərində nümayəndə heyətinin üzvləri – İslam Konfransı Gənclər Forumu Avrasiya Regional Mərkəzinin rəhbəri Elçin Əsgərov, DQİDK Beynəlxalq Əlaqələr şöbəsinin müdiri Nicat Məmmədli və Azərbaycan Respublikasının İrandakı səfiri Cavanşir Axundov iştirak etmişlər.