Yanvarın 31-də Göyçay Peşə Liseyində Rayon İcra Hakimiyyəti (RİH), Rayon Polis Şöbəsi (RPŞ) və Dini Qurumlarla İş üzrə Dövlət Komitəsinin Ucar bölgəsi üzrə şöbəsinin birgə təşkilatçılığı ilə “Zərərli vərdişlərə, dini radikalizmə, erkən nikaha yox deyirik" mövzusunda gənclərlə maarifləndirici görüş keçirilib.

Tədbirdə Göyçay Rayon İcra Hakimiyyəti başçısının müavini Zivər Zeynalova, RPŞ-nin rəisi Sənan Əsədov, Rayon Təhsil Şöbəsinin müdiri Elnur İsmayılov, Dini Qurumlarla İş üzrə Dövlət Komitəsinin Ucar bölgəsi üzrə şöbəsinin müdiri Əzim Rəfiyev, rayon prokurorunun böyük köməkçisi Murad Əliyev, rayon Təcili və Təxirəsalınmaz Tibbi Yardım Stansiyasının baş həkimi Əli Əsgərov, Göyçay Gənclər Mərkəzinin direktoru Anar Nağıyev, tələbələr və müəllimlər iştirak ediblər.

Tədbiri giriş sözü ilə açan Dövlət Komitəsinin Ucar bölgəsi üzrə şöbəsinin müdiri Əzim Rəfiyev mövzunun əhəmiyyətindən danışıb. Bu cür tədbirlərin keçirilməsinin zəruriliyini vurğulayıb.

Göyçay Rayon İcra Hakimiyyəti başçısının müavini Zivər Zeynalova isə çıxışında rayondakı dini durum, radikalizm və zərərli vərdişlərə qarşı həyata keçirilən tədbirlərdən bəhs edib.

Çıxış edən digər natiqlər dini radikalizm və ekstremizmin fəsadlarından, zərərli vərdişlərə qarşı mübarizə üsullarından və onların insan orqanizminə vurduğu zərərdən və hüquqa zidd əməllərdən qorunma yollarından danışıblar.

Sonda tədbir iştirakçılarını maraqlandıran suallar cavablandırılıb.