Dövlət Komitəsi sədrinin birinci müavini Səyyad Salahlının iştirakı ilə şimal-qərb bölgəsində növbəti seminar-müşavirə keçirilib

13.10.2017

Oktyabrın 13-də Qəbələ Rayon Mədəniyyət Mərkəzində “İslam həmrəyliyinin təbliğində dini icmaların fəaliyyətinin başlıca istiqamətləri” mövzusunada seminar-müşavirə keçirilib.

Dini icma sədrləri və ictimaiyyət nümayəndələrinin iştirakı ilə keçirilən tədbiri giriş sözü ilə açan Qəbələ Rayon İcra Hakimiyyəti (RİH) başçısının müavini – İctimai-siyasi və humanitar məsələlər şöbəsinin müdiri Ətayə Osmanova rayondakı dini durum barədə ümumi məlumat verib. Ə.Osmanova Qəbələdə həyata keçirilən dini maarifləndirmə tədbirlərindən, eyni zamanda, dini icmaların fəaliyyəti üçün yaradılan şəraitdən danışıb.

DQİDK sədrinin birinci müavini Səyyad Salahlı çıxışında qeyd edib ki, Azərbaycan xalqı son dövrlərdə ateizm və mövhumat arasında ən doğru orta yolu formalaşdırır. Bu yol dini cəhalətdən dünyəvi maarifçiliyə keçidi və bu kontekstdə İslamın cəmiyyət həyatında yalnız müsbət rol oynamasını təşviq edir. Bu proses müstəqillik illərində dövlətin əsas prioritetlərindən birinə çevrilib. S.Salahlı bildirib ki, Ulu Öndər Heydər Əliyev tərəfindən yürüdülən bu uzaqgörən siyasətin əsas mahiyyəti inanc dəyərlərimizin milli xüsusiyyətlərimizlə uzlaşdırılması və İslamın savaşa, məzhəblərarası konfliktlərə, cəmiyyətdə mənəvi durğunluğa sürüklənməməsidir. Ölkəmizdə elan olunan “İslam Həmrəyliyi İli”nin təsadüfi olmadığına diqqət çəkən sədr müavini son 25 ildə bir çox istiqamətlər üzrə nümunələr, örnəklər yaradan ölkəmizdə İslamın zərərli və dağıdıcı təsirlərdən qoruyan mükəmməl Azərbaycan modelinin formalaşdığını deyib. O bildirib ki, Prezident İlham Əliyevin xüsusi diqqət ayırdığı dini maarifçilik, dini icmalara dövlət qayğısı, məzhəblərarası ünsiyyət Azərbaycanda dini radikalizmin, ekstremizmin yayılmasına qarşı əhəmiyyətli rol oynayır.

Seminar - müşavirə dini icma rəhbərlərini maraqlandıran sualların cavablandırılması ilə yekunlaşıb.