AXC-nin yaranmasının 100 illiyi münasibətilə Bakıda tədbirlər keçirilib

24.05.2018

Mayın 23-də DQİDK və Xətai Rayon İcra Hakimiyyətinin (RİH) birgə təşkilatçılığı ilə Xətai rayonunda yerləşən 171 və 95 saylı orta məktəblərdə Azərbaycan Xalq Cümhuriyyətinin yaranmasının 100 illiyi mövzusu müzakirə olunub. Tədbirlərdə DQİDK-nın Bakı şəhəri üzrə şöbəsinin əməkdaşları Vasif Musayev və Fidan Aslanova, Xətai RİH başçısı Aparatının İctimai-siyasi və humanitar məsələlər şöbəsinin müdir müavini - dini qurumlarla işin təşkilatçısı Məhəmməd İbrahimov, adıçəkilən məktəblərin müəllim və şagird kollektivi iştirak ediblər.

Vurğulanıb ki, Azərbaycan Xalq Cümhuriyyətinin (AXC) yaranması xalqımızın dövlətçilik salnaməsinin yaddaqalan səhifələrindəndir. Keçirilən tədbirlərdə o da bildirilib ki, AXC-nin demokratik dövlət quruculuğu, iqtisadiyyat, mədəniyyət, təhsil, səhiyyə və hərbi quruculuq sahələrində həyata keçirdiyi tədbirlər xalqımızın tarixində silinməz iz buraxıb, milli dövlətçilik ənənələrimizin bərpası işində böyük rol oynayıb.

Çıxışlarda Prezident İlham Əliyevin 2018-ci ili ölkəmizdə “Azərbaycan Xalq Cümhuriyyəti İli” elan etməsi XX əsrin ən mühüm hadisələrindən olan cümhuriyyət tarixinə verdiyi yüksək qiymət kimi dəyərləndirilib.