Dekabrın 1-də Masallı rayonunda “QİÇS xəstəliyi, onun zərərləri və ondan qorunma yolları” mövzusunda seminar-treninq keçirilib.

Tədbirdə Dini Qurumlarla İş üzrə Dövlət Komitəsinin (DQİDK) Masallı bölgəsi üzrə şöbəsinin müdiri Elvin Hüseynli, rayon Gənclər və İdman İdarəsinin rəisi Sabiq Cahangirov, Regional Mədəniyyət İdarəsinin əməkdaşı Salman Yunusov, Masallı Regional Kollecin müəllimləri, tələbələri və gənclər iştirak ediblər.

Masallı Rayon Gənclər və İdman İdarəsinin rəisi Sabiq Cahangirov çıxış edərək bildirib ki, İİV-infeksiyası/QİÇS pandemiyası dünya səhiyyəsinin infeksion xəstəliklər sahəsində ən ciddi problemlərindən biridir. O, çıxışında AİDS və narkomaniyanın insanlara, xüsusilə gənc nəslə vurduğu zərərlərdən və narkomaniya ilə mübarizə sahəsində görülən işlərdən, həyata keçirilən tədbirlərdən danışıb. Qeyd edib ki, bu işdə təkcə dövlət strukturları deyil, cəmiyyətin bütün təbəqələri fəal iştirak etməlidirlər. Ölkəmizdə gənc nəslə həmişə böyük qayğı ilə yanaşan Prezident İlham Əliyevin rəhbərliyi ilə bu istiqamətdə həyata keçirilən dövlət siyasətindən danışan S.Cahangirov deyib ki, narkomaniyaya qarşı mübarizədə daha səmərəli nəticələrə nail olmaq, gəncləri bu bəladan qorumaq, onlarda sağlam həyat tərzini formalaşdırmaq üçün hamı birgə mübarizə aparmalı, yeniyetmə və gənclər arasında maarifləndirmə işləri daim diqqət mərkəzində saxlanılmalıdır.

Tədbirdə Dini Qurumlarla İş üzrə Dövlət Komitəsinin Masallı bölgəsi üzrə şöbəsinin müdiri Elvin Hüseynli, Komitənin Masallı bölgəsi üzrə şöbəsinin əməkdaşı Kamil Bağırov, Masallı Regional Mədəniyyət İdarəsinin məsləhətçisi Salman Yunusov mövzu ətrafında çıxış ediblər. Çıxış edənlər QİÇS xəstəliyinin dünyanın digər ölkələrində olduğu kimi, Azərbaycanda da yayıldığını, hər kəsi düşündürən aktual məsələlərdən biri olduğunu vurğulayaraq ölkəmizin bütün bölgələrində, o cümlədən Masallıda bu bəlaya qarşı vaxtaşırı olaraq tədbirlərin keçirildiyini diqqətə çatdırıblar.

Sonda gənclərə mövzu ilə bağlı hazırlanmış bukletlər paylanılıb.