İslam həmrəyliyinə dair tədbir keçirilib
09 mart 2017, 09:20
Martın 9-da Qubadlı Rayon İcra Hakimiyyətində rayon İcra Hakimiyyəti, Dini Qurumlarla İş üzrə Dövlət Komitəsinin (DQİDK) Sumqayıt bölgəsi üzrə şöbəsi, Qubadlı Rayon Prokurorluğu və Yeni Azərbaycan Partiyası Qubadlı rayon təşkilatı Gənclər Birliyinin birgə təşəbbüsü ilə “İslam həmrəyliyi müsəlman ölkələrinin qlobal təhdidlər qarşısında dayanıqlığının təminatçısı kimi” mövzusunda tədbir keçirilib.
Tədbirdə Qubadlı Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini - dini qurumlarla işin təşkilatçısı Elşən Qəhrəmanov, DQİDK-nın Sumqayıt bölgəsi üzrə şöbəsinin aparıcı məsləhətçisi Ülvi Məmmədov, YAP Qubadlı rayon təşkilatı Gənclər Birliyinin sədri Aqil Quliyev, Qubadlı rayon prokurorunun böyük köməkçisi Fuad Əliyev, rayon ictimaiyyətinin nümayəndələri iştirak ediblər.
Tədbiri giriş sözü ilə açan Qubadlı Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Elşən Qəhrəmanov ölkə başçısının müvafiq Sərəncamı ilə 2017-ci ilin “İslam Həmrəyliyi İli” elan olunmasının Qubadlı ictimaiyyəti tərəfindən də yüksək qiymətləndirildiyini bildirib.
Rayon prokurorunun böyük köməkçisi Fuad Əliyev çıxışında müsəlman xalqlarının vəhdətini pozan, məzhəblərarası zəmində qarşıdurmalar salaraq ölkələrin milli təhlükəsizliyini təhdid edən radikal dini cərəyanlara qarşı mübarizənin hüquqi aspektlərini geniş şərh edib.
DQİDK-nın Sumqayıt bölgəsi üzrə şöbəsinin aparıcı məsləhətçisi Ülvi Məmmədov və YAP Qubadlı rayon təşkilatı Gənclər Birliyinin sədri Aqil Quliyev çıxışlarında Azərbaycanda keçiriləcək IV İslam Həmrəyliyi Oyunlarını müsəlman xalqlarının birliyinə, vəhdətinə nail olmaq üçün tarixi fürsət kimi dəyərləndiriblər.