“İslam həmrəyliyi – düşüncə tariximizin dünəni və bu günü” layihəsi uğurla icra olunur
25 avqust 2017, 04:54
Avqustun 25-də Sumqayıt şəhərində “Cümə” məscidi dini icmasının “İslam həmrəyliyi – düşüncə tariximizin dünəni və bu günü” layihəsi çərçivəsində “Azərbaycanda dövlət–din münasibətlərinin keçmişi, bugünü və gələcəyi” mövzusunda növbəti tədbir keçirilib.
Tədbirdə DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov, Sumqayıt şəhəri “Cümə” məscidinin axundu və dini icma sədri Rauf Sərdarov, ilahiyyatçı Əli Şərbətov və gənclər iştirak ediblər.
Giriş sözü ilə çıxış edən dini icma sədri Rauf Sərdarov Azərbaycanda tarixən formalaşan dövlət-din münasibətlərinin özünəməxsusluğundan, dövlətin dinə olan qayğısından söhbət açıb.
DQİDK-nın Sumqayıt bölgəsi üzrə şöbəsinin əməkdaşı Ülvi Məmmədov dünyəvi dövlət modelində dövlətin dinə münasibəti, onlar arasındakı əlaqələri tarixi elmi-fəlsəfi istiqamətdə şərh edib, milli-dini dəyərlərin qorunması, insan və vətəndaş hüquq və azadlıqlarının qorunması baxımından ölkəmizin də sahib olduğu dünyəvi dövlətçilik prinsipinin uğurlu və təminatlı olduğunu vurğulayıb.
Tədbirdə iştirak edən ilahiyyatçı Əli Şərbətov Quran ayələrindən misallar gətirərək İslamda dövlət haqqının məramından söhbət açıb.
Tədbirin sonunda iştirakçıları maraqlandıran suallar cavablandırılıb və dini təyinatlı ədəbiyyatlar paylanılıb.