Azərbaycan Respublikasının Dini Qurumlarla İş üzrə Dövlət Komitəsinin sədri Mübariz Qurbanlı “Səs” qəzetinin baş redaktoru Bəhruz Quliyevi qəzetin yaranmasının 28 illiyi münasibətilə təbrik edib. SİA-nın verdiyi məlumata görə, təbrikdə bildirilir ki, Azərbaycan mətbuatı tarixində özünəməxsus yeri olan və bir sıra uğurlara imza atan “Səs” qəzeti Ümummilli Liderimiz Heydər Əliyevin parlaq ideyalarına sadiq qalaraq Yeni Azərbaycan Partiyasının ideoloji-siyasi kursunun təbliğində mühüm rol oynayır: "“Səs” qəzeti mənim üçün ən əziz qəzetdir”- deyən Ulu Öndərin etimadını rəhbərlik etdiyiniz qəzet bütün fəaliyyəti ilə doğruldur. Eyni zamanda, “Səs” qəzeti möhtərəm Prezidentimiz cənab İlham Əliyevin rəhbərliyi ilə dünyanın lider ölkələrindən birinə çevrilən Azərbaycanda baş verən müsbət dəyişikliklərin, eləcə də ölkə həqiqətlərinin ictimaiyyətə dəqiq və qərəzsiz çatdırılmasında böyük rol oynayır. Sizi bir daha bu əlamətdar gün münasibətilə təbrik edir, rəhbərlik etdiyiniz qəzetin kollektivinə yeni-yeni yaradıcılıq uğurları arzulayıram".