“Dini maarifləndirmə və gənclərlə iş” mövzusunda təlimin ikinci günündə Azərbaycan İlahiyyat İnstitutunun İlahiyyat fakültəsinin dekan müavini, sosiologiya üzrə fəlsəfə doktoru, dosent Asəf Qənbərovun təqdimatında “Post-modern dövrdə milli-mənəvi dəyərlərin əhəmiyyəti”, Mənəvi Dəyərlərin Təbliği Fondunun icraçı direktorunun müavini Ceyhun Əliyevin təqdimatında isə “Dini maarifləndirmə işinin təşkili” mövzularında təlimlər keçirilib.

Bakı Gənclər Mərkəzində təşkil olunan tədbirin bağlanış mərasimində Gənclər və İdman Nazirliyinin Gənclərlə iş şöbəsinin müdiri Ülviyyə Axundova və Dini Qurumlarla İş üzrə Dövlət Komitəsinin Ekspertiza şöbəsinin müdiri Nahid Məmmədov çıxış edərək proqramı uğurla başa vuran iştirakçıları təbrik ediblər.

Tədbir IX “Muğam” Televiziya Müsabiqəsinin finalçısı Yusif Cəfərbəyli, gənc ifaçılar Səxavət Məmmədov və Mahir Quliyevin ifaları ilə davam edib.