Dini Qurumlarla İş üzrə Dövlət Komitəsinin sədri Mübariz Qurbanlı İctimai televiziyanın "Çarçı" informasiya proqramına Azərbaycan Respublikası Prezidenti Administrasiyası rəhbərinin Sərəncamı ilə 2017-ci ilin Azərbaycanda “İslam Həmrəyliyi İli” elan edilməsinə dair təsdiq edilmiş Tədbirlər Planına əsasən həyata keçiləcək tədbirlər barədə müsahibə verib.
Mübariz Qurbanlı müsahibəsində qeyd edib ki, Azərbaycan müxtəlif multikultural dəyərləri özündə ehtiva edən tolerant ölkədir. Bunun dünyaya çatdırılmasında dövlət başçısının Sərəncamı mühüm rol oynayacaqdır. İslamofobiyanın aradan qaldırılması üçün, İslamı gözdən salmaq cəhdlərinin aradan qaldırılması üçün İslamın olduğu kimi dünyaya çatdırılması çox vacibdir. İslamın olduğu kimi dünyaya çatdırılmasının ən əsas yollarından biri İslamın əsas qayəsi, mənbəyi olan “Qurani Kərim”in olduğu kimi insanlara çatdırılmasıdır. “Qurani-Kərim” oxuyan hər bir şəxs istər xristian, istər buddist, istər yəhudi olsun, fərq etməz, burada bütövlükdə insanlıq üçün çox dəyərli mesajların, Quran ayələrindəki fikirlərin insanlıq üçün çox böyük yol olduğunu görə bilər. Komitə sədri müsahibəsində bildirib ki, “İslam Həmrəyliyi İli” istiqamətində görülən işlər islamofobiya, İslamın gözdən salınması istiqamətindəki aparılan təşviqata, təbliğata da çox böyük, ciddi zərbə vuracaqdır. “İslam Həmrəyliyi İli” çərçivəsində İslam dünyası ilə digər dini konfessiyaların mövcud olduğu ölkələr arasında həmrəylik bağı yaradılacaqdır. Bu da İslam həmrəyliyinə böyük töhfə verəcəkdir.
Müsahibəyə aşağıdakı linkdən ətraflı baxa bilərsiniz:
.jpg)
